Nota de Prensa de Edicións Benigno Álvarez

NOTA INFORMATIVA DE EDICIÓNS BENIGNO ÁLVAREZ

O HISTORIADOR GROVER FURR VISITARÁ GALIZA PARA PRESENTAR O SEU LIBRO AS MENTIRAS DE KHRUSHCHEV

Desde Edicións Benigno Álvarez queremos informar da próxima visita ao noso país do historiador estadounidense Grover Furr, quen presentará o seu libro As Mentiras de Khrushchev, obra publicada en lingua galega que acaba de saír do prelo.

Palestras-debate de Grover Furr:

Compostela

Cuarta feira 22 de maio, ás 19 horas

Galería Sargadelos. Rúa Nova, 16

Organiza Forxa

Ferrol

Quinta feira 23 de maio, ás 19:30 horas

Escola Oficial de Idiomas. Rúa Real, 29

Organiza Forxa

Vigo

Sábado 25 de maio, ás 19 horas

 Local da Asociación Cultural Bou Eva. Rúa Terzo de Fóra, 11

Organiza A.C. Bou Eva

Sobre o libro:

As Mentiras de Khrushchev, publicada orixinalmente en lingua rusa no ano 2007 e traducida para o inglés, vietnamita, turco e, agora, galego, céntrase no coñecido Discurso Secreto que Nikita Khrushchev pronunciou no XX Congreso do PCUS, discurso moitas veces considerado como o máis influínte do pasado século. O libro reúne as sorprendentes conclusións do traballo de investigación que, durante dez anos, o autor realizou estudando as fontes primarias, nomeadamente dos arquivos soviéticos. O seu dominio do ruso permitiulle analizar polo miúdo, e sen intermediarios, unna documentación histórica que bota algo máis que sombras sobre as “revelacións” de Khrushchev. “Revelacións” que provocaron radicais cambios, non só no Movemento Comunista Internacional, senón posibelmente no mundo.

Desde a súa publicación en ruso, esta obra de Grover Furr ocupa un lugar central nos círculos académicos rusos, onde máis avanzada está a investigación sobre a historia da Unión Soviética.

Sobre o autor:

Grover Furr (Washington D.C., 1944), Doutor en Literatura Medieval Comparada pola  Princeton University, forma parte desde 1970 do Departamento de Inglés da Montclair State University.

Incluído no libro Os 101 académicos máis perigosos dos Estados Unidos do escritor dereitista David Horowitz, interesouse desde a súa mocidade pola lingua e literatura rusas. Desde a década dos 70 especializouse no estudo da historia soviética, concretamente da época de Stalin.

Publicou desde entón incontábeis artigos históricos en numerosas revistas especializadas, así como cinco libros, algúns deles en colaboración con outros investigadores rusos e estadounidenses:

- As Mentiras de Khrushchev. Edicion orixinal en ruso por Algoritmo. Moscova. 2007.       

- Stalin calumniado. Xunto con Iurii Mukhin e Aleksei Golenkov. En ruso. Eksmo. Moscova. 2009.

- 1937. A xustiza de Stalin. Nada que apelar. Con Vladimir Bobrov. En ruso. Eksmo. Moscova. 2010.

- Beria. Imperio GULAG. Xunto con David Holloway e Donald Rayfield. En ruso. Algoritmo. Moscova. 2012.

- Stalin e a Democracia. Trotski e os Nazis. En turco. Yazilama. Istambul. 2013.

Sobre a Editorial

Edicións Benigno Álvarez nace coa publicación desta obra e ten vocación de continuidade.

Edicións Benigno Álvarez é unha editorial galega, independente e de carácter comunista, cuxo obxectivo é difundir na Galiza obras impresas en lingua galega relacionados coa historia do socialismo e co movemento comunista. Todo o diñeiro recadado na venda dos nosos libros vai destinado aos gastos de edición, distribución e, se posíbel, publicación de novos materiais.